မြန်မာ တနိုင်ငံလုံးရဲ့ ပထမဆုရှင် မသင်းမြနွေးရဲ့ ရင်တွင်းစကားလေးများ

၂၀၁၈ တက္ကသိုလ်ဝင်တန်း စာမေးပွဲရဲ့ အောင်စာရင်းများကို June လ 2 ရက်နေ့ မနက် 6 နာရီ တွင် ထုတ်ပြန်ခဲ့ရာ ဖြေဆိုသူ 750,000 ကျော်မှာ အောင်မြင်သူ 250,000 ကျော် ရှိခဲ့ပြီး အောင်ချက် ရာခိုင်နှုန်း ကတော့ 32.82 % ရှိခဲ့ပါတယ် ။ ဂုဏ်ထူးရှင်ပေါင်း ၇၅၇၅၆ ဦး ပေါ်ထွက် ခဲ့ပါတယ် ။ သိပ္ပံ ဘာသာတွဲနဲ့ မြန်မာ တနိုင်ငံလုံး အမှတ် အများဆုံး ၅၅၃ မှတ်ဖြင့် အထက (၁) ဒဂုံမှ ခြောက်ဘာသာ ဂုဏ်ထူးရှင် မသင်းမြနွေးက ပထမ ရရှိခဲ့ပါတယ် ။ အသက် ၁၆ နှစ် အရွယ် ကျောင်းသူလေး မသင်းမြနွေးက တဘာသာ ပျမ်းမျှ ရမှတ် ၉၂ မှတ်ကျော် ရရှိခဲ့ပါတယ် ။ သူမရဲ့ ယခုလို ထူးချွန်စွာ အောင်မြင်ခဲ့ခြင်းရဲ့ ရင်တွင်း စကားသံလေးတွေနဲ့ ကြိုးစား အားထုတ်ပုံလေး တွေကို ပရိတ်သတ်တွေ အတွက် တင်ဆက်ပေးလိုက် ပါတယ် ။

" သမီး The Whole Burma First ဆု ရဖို့ကို မမျှော်မှန်းရဲ ခဲ့ဘူး ။ မျှော်မှန်း မထားပဲ ရခဲ့တော့ တအားလည်း အံ့အားသင့်မိ ပါတယ် ။ အရမ်းကိုလည်း ပျော်ပါတယ်။ ဘာသာစုံ ဂုဏ်ထူးတော့ ပါချင်ခဲ့ပါတယ် ။ ဒါပေမဲ့ နှစ်ဝက်စာ မေးပွဲမှာလည်း ကျောင်းမှာ အမှတ်အများဆုံး ရခဲ့တယ် ။ နှစ်ဆုံး Pre Test မှာလည်း ၅၅၃ မှတ် ရခဲ့တော့ ဖြစ်ချင်တာတော့ ရှိတယ် ။ သမီး The Whole Burma First ဖြစ်လိမ့်မယ် လို့တော့ မမျှော်လင့်ထားဘူး "

" စာကျက်ချိန်က အချိန်ဇယား ကိုတော့ အတိအကျကြီး မဆွဲထားပါဘူး ။ စာမေးပွဲတွေ ဖြေကြည့်တဲ့ အခါမှာ ကိုယ်အားနည်းတယ် ထင်တဲ့ ဘာသာရပ်တွေကို ပိုပြီး သေသေချာချာ ဂရုစိုက်ပြီးတော့ လုပ်ဖြစ်တယ်။ တနေ့စာ တနေ့ ပုံမှန် စာလုပ်သွား ပါတယ် ။ မနက်ပိုင်းက ကျောင်းသွားတာ များတော့ ညနေပိုင်း ကနေ ည ၁၂ နာရီထိ ပုံမှန် စာကြည့်ဖြစ် ပါတယ် ။ ကျောင်းချိန်၊ ကျူရှင်ချိန် မရှိရင်တော့ မရှိသလို စာကြည့်ဖြစ်တယ် "

" အိပ်ချိန်ကိုတော့ တနေ့ကို အနည်းဆုံး ခြောက်နာရီ ရအောင် အိပ်ပါတယ်။ ကျောင်းက စာမေးပွဲ တွေကိုလည်း သေချာဖြေတယ်။ စာမေးပွဲကြီး မဖြေခင် ကျောင်းမှာ နောက်ဆုံးဖြေခဲ့တဲ့ စာမေးပွဲမှာလည်း အမှတ်ပေါင်း ၅၅၃ ပဲ ရခဲ့ပါတယ် ။ ဆရာမတွေ သင်တဲ့အချိန်တော့ အကုန်လုံးကို သိထားအောင် သေချာလိုက်နားထောင်တယ်။ မှတ်တယ်။ ကိုယ့်ဟာကိုယ် ပြန်လေ့ကျင့်တဲ့ အချိန်မှာတော့ အရေးကြီးဆုံးဟာတွေ၊ အဓိကကျတဲ့ ဟာတွေကို ရွေးထုတ် ပြီး သေချာပိုလေ့လာဖြစ်တယ် "

" ဒီနှစ်မှာ အင်္ဂလိပ်စာက မေးခွန်း ပုံစံတွေ အသစ်တွေ ဖြစ်လာတယ်။ Letter Essay  ဆိုလည်း ပုံစံ တမျိုး ပြောင်းပီး မေးတယ် ။ Grammar တွေ ဆိုလည်း မေးခွန်းတွေ လှည့်ထားတယ် ။ ပေးထားတဲ့ ခေါင်းစဉ်တွေထဲက ကိုယ်နဲ့ ဘယ်အပုဒ်က အမှတ် ပိုရမလဲ ဆိုတာ သေချာ စဉ်းစားပြီးမှပဲ ရွေးဖြေတယ် ။ မေးခွန်း ခေါင်းစဉ်ကို သေချာ ဖတ်ပြီး အဲဒီ ခေါင်းစဉ်ရဲ့ သဘောတရား၊ သူက ဘာမေးချင်တာလဲ၊ ကိုယ် ဘာဖြေရမလဲ ဆိုတာကို သေသေချာချာ နားလည်အောင် လုပ်တယ် ။ ပြီးရင် ရေးမယ့် အချက်လေးတွေကို အကြမ်းဖျင်းမှတ်ထားပြီး အဲဒီကနေ ထပ်စဉ်းစားပြီး ရေးခဲ့တယ် "

" ဆရာ ဆရာမတွေကလည်း စာသင်တာနဲ့ တခါတည်း အမှတ်ပေး စည်းမျဉ်းကိုပါ ပြောပြပေးပါတယ် ။ ဒီအပုဒ်မှာ ဒါဖြေတာနဲ့ အမှတ် ဘယ်လောက် ပေးတယ် ၊ ဒါမပါရင် ဘယ်လောက် လျှော့တယ် ဆိုတာမျိုးကအစ သေချာပြောပြပေး ပါတယ် "

" စိတ်ဖိစီးမှု ဆိုတာကတော့ ရှိပါတယ် ။ ဒါပေမဲ့ စာမေးပွဲ မဖြေချင်လောက်အောင် စိတ်ဓာတ် ကျတာတော့ မကြုံဖူးဘူး ။ သမီး စိတ်ဖိစီးမှု များလာတဲ့ အချိန်ဆို စာမကျက်တော့ဘူး ။ လမ်းလျှောက်တယ်။ သီချင်း နားထောင်တယ်။ တီဗီ ကြည့်တယ် ။ စိတ် အပန်းဖြေပြီးမှ စာပြန် ကျက်ပါတယ် ။ တခါတလေ ကျတော့လည်း သူငယ်ချင်း တွေနဲ့ နေ့ချင်းပြန် ခရီး သွားတာမျိုးတွေ လုပ်တယ် ။ ကျောင်းစာ အပြင် သတင်းစာလည်း ဖတ်တယ်။ ဆရာမင်းလူရဲ့ စာအုပ်တွေ ဖတ်တယ် ။ မင်္ဂလာမောင်မယ်လို စာအုပ်မျိုးတွေလည်း ဖတ်တယ် ။ နောက် ပြီးတော့ စုံထောက် ၀တ္ထုတွေ ဖတ်ရတာ အရမ်း သဘောကျပါတယ် "

" မေမေက စာကျက်နေတဲ့ အချိန် တချိန်လုံး စောင့်ပေးပါတယ် ။ ပြန်နွှေးချင်တဲ့ စာတွေ ရှိရင် ကြည့်ပေးတယ်။ သမီးရဲ့ ကျန်းမာရေးဘက် မှာလည်း လစ်ဟာမှု မရှိအောင် အစားအသောက်က အစ သေချာ စီစဉ်ပေး ပါတယ် "

" သမီး သူငယ်တန်း ကနေ ရှစ်တန်းအထိ နှစ်စဉ် ပထမ ၊ ဒုတိယဆုတွေ ရတယ်။ လေးတန်းတုန်းက ဘက်စုံထူးချွန် ၀င်ပြိုင်တော့ ဘာသာရပ် တခုချင်း အလိုက် ဆုတွေ ရခဲ့တယ်။ ငါးတန်းကနေ ရှစ်တန်း အထိ သင်္ချာ ထူးချွန်တွေ ၀င်ပြိုင်ခဲ့ပြီးတော့ မြို့နယ် ၊ ခရိုင်၊ တိုင်း အဆင့်ဆုတွေ ရခဲ့ပါတယ် ။ ရှစ်တန်းတုန်းက မြန်မာစာ ထူးချွန် တိုင်းအဆင့် ဆု ရခဲ့ပါတယ် ။ စာစီစာကုံးပြိုင်ပွဲတွေ ၀င်ပြိုင်ပြီးတော့လည်း ဆုတွေ ရရှိခဲ့ပါတယ် "

" အခုအောင်စာရင်းလည်းထွက်ပြီးပြီ ။ တက္ကသိုလ် တခုခု ရွေးရတော့မယ် ဆိုတော့ နည်းနည်းတော့ ဇဝေဇ၀ါ ဖြစ်နေပါတယ် ။ ဆေးတက္ကသိုလ် ဒါမှမဟုတ် ရန်ကုန်နည်းပညာတက္ကသိုလ် တခုခုတက်ဖို့ စဉ်းစားထား ပါတယ် ။ ပို ၀ါသနာ ပါတာကတော့ ရန်ကုန်နည်းပညာတက္ကသိုလ်ပါ "

" သမီး လေးစား အားကျရတဲ့သူ ကတော့ သမီးရဲ့ အဖေပါ ။ သမီး ငယ်ငယ်လေး ကတည်းကနေ အခုထိ ဘာသာတရား ရိုသေ ကိုင်းရှိုင်းတတ်အောင် သင်ပေးပါတယ် ။ အမှားကနေ သင်ခန်းစာ ယူပြီး ပြင်ဆင်တတ်အောင် အမြဲ တွန်းအားပေး လေ့ကျင့်ပေး ပါတယ် ။ ပြီးတော့လည်း ကျောင်းစာအပြင် အပြင်စာအုပ်တွေ၊ စာစောင်တွေ ၀ယ်ပြီး အမြဲ ဖတ်ခိုင်းတယ် ။ ပြီးတော့ သမီးရဲ့ အစ်မ ကလည်း ဆယ်တန်းမှာ ခြောက်ဘာသာ ဂုဏ်ထူး ပါခဲ့တော့ သူကလည်း စံထား အားကျရတဲ့သူ တဦးပါ ။ သမီး စာလေ့လာတဲ့ အခါမှာလည်း ဘယ်ဟာမျိုးတွေက အရေးကြီးတယ် ၊ ဘာတွေကို သေချာ ကြည့်သင့်တယ် ဆိုတာ ကူညီ ပြောပြပေးခဲ့ ပါတယ် "

" လာမဲ့နှစ် ၁၀ တန်းဖြေဆိုကြမဲ့ မောင်လေး ညီမလေးတွေကို ပြောချင်တာက မေးခွန်းပုံစံတွေလည်း ပြောင်းမယ် ဆိုတော့ ကိုယ်ဖြေရမယ့် မေးခွန်း ပုံစံတွေနဲ့ အကျွမ်းတ၀င် ဖြစ်အောင်၊ သေချာ နားလည်အောင် ဆရာ ၊ ဆရာမတွေ ပြောတာကို သေချာ မှတ်သားထား ပါ ၊ ကျန်းမာရေးကို မလစ် ဟင်းအောင် အထူး ဂရုစိုက်ပါ၊ ဘာသာတရားလည်း ရိုသေ ကိုင်းရှိုင်းပါလို့ ပြောချင်ပါတယ် "

Credit
LoveShotNotes