သီချင်းစာသား မေ့ရခြင်းအကြောင်းကို ပြောပြခဲ့တဲ့ ချမ်းမြေ့မောင်ချို

မြန်မာအိုက်ဒေါ Season 3 ပြိုင်ပွဲဝင် ချမ်းမြေ့မောင်ချိုက သူ့ရဲ့ ပရိသတ်တွေ Fan Meeting တွေ့ဆုံပွဲကို သြဂုတ်လ ၅ ရက်နေ့က ရန်ကုန်မြို့ရှိ Gandamar Grand Ballroom မှာ ကျင်းပခဲ့ပါတယ်။ ဒီပွဲမှာ ချမ်းမြေ့မောင်ချိုက အမှားတွေ ရှိခဲ့ပေမယ့် အကောင်းဆုံးဖြစ်အောင် ကြိုးစားသွားကာ မှားခဲ့တာတွေကိုလည်း စိတ်မကောင်းဘူးလို့ မီဒီယာတွေကို ပြောပါတယ်။

“ Finalist ၂ ယောက်က ကိုယ့်ဒေသကိုယ်ပြန်ပြီး ကိုယ့် Fan တွေနဲ့ ကိုယ်တွေ့ကြတယ်။ ပြိုင်ပွဲကလည်း လုပ်လာတာ ကြာပြီ ဆိုတော့ အိမ်ကိုလည်း လွမ်းတယ်။ အမေတို့ကို လာတွေ့ရင်း Fan Meeting လေး လုပ်ဖြစ်တာပါ။ ဘယ်လောက်ပဲ မှားခဲ့မှားခဲ့ အကောင်းဆုံးဖြစ်အောင် ကြိုးစားပြီးတော့ တင်ဆက်ပါ့မယ်။ ဒီလိုမျိုး ဖြစ်သွားတဲ့ အတွက်လည်း စိတ်မကောင်းပါဘူး”

သီချင်းစာသား မေ့ရတဲ့ အကြောင်းအရင်းမှန်ကိုလဲ အခုလို ရှင်းပြခဲ့ပါတယ်။

“ သမီး အရင်တုန်းက အင်္ဂလိပ်သီချင်း နားထောင်တာ များတယ်။ ခုတော့ မြန်မာသီချင်းတွေ ဆိုရတယ်။ အရမ်း စိတ်လှုပ်ရှား လို့ စာသားလေးတွေ မေ့တာပါ။ ပွဲထဲမှာ လူအရမ်းများတော့ စိတ်လဲ လောသွားတယ်။ Mood လည်း အရမ်းဝင်သွားတော့ မဆိုရမယ့် အပိုင်းတွေလည်း ဆိုဖြစ်သွားတယ်။ အဲ့တာ အရမ်း စိတ်လှုပ်ရှားတာကြောင့်ပါ ” လို့ ပြောပါတယ်။

ချမ်းမြေ့မောင်ချိုကို ပရိသတ်တွေက အားပေးမှုတွေ ရှိတာကြောင့် ဘယ်လောက်ပဲ ဝေဖန်ပါစေ စိတ်ဓာတ်မကျဘူး လို့ ဆိုပါတယ်။

“ပရိသတ်တွေက အားမငယ်နဲ့ သူတို့ရှိတယ်။ သူတို့ကြောင့်လည်း မောင်ချိုဆိုတာဖြစ်လာတဲ့အတွက် သူတို့စကား နားထောင်တယ်။ သူတို့ကတောင်အားမငယ်ပဲ ဆက်ပြီး အားပေးနေသေးတာ ကိုယ်ကဘာလို့ စိတ်ဓာတ်ကျရမှာလဲ။ သူတို့ကိုလည်း သမီး ကျေးဇူးဆပ်ချင်တဲ့အတွက် စိတ်ကို ပြန်အားတင်းတယ်။ မရရအောင် လုပ်မယ် ဆိုတဲ့ စိတ်နဲ့ ပြန်အားတင်း နေပါတယ်။ Winner ရသည်ဖြစ်စေ မရသည်ဖြစ်စေ၊ သမီးကတော့ အနုပညာ လမ်းကြောင်းမှာ သီချင်းတွေ လုပ်သွားမယ်။ ပရိသတ်တွေ ဘယ်လိုပုံစံတွေကြိုက်လဲ။ သမီးပြန်စဉ်းစားပြီး စီစစ်ပြီး သမီး လုပ်သွားမှာပါ ” လို့ ချမ်းမြေ့မောင်ချိုက ပြောပါတယ်။

Myanmar Idol Season 3 သီချင်းဆို ပြိုင်ပွဲရဲ့ နောက်ဆုံး ယှဉ်ပြိုင်မှုကို လာမယ့် သြဂုတ်လ ၁၁ ရက်နေ့မှာ ကျင်းပသွားမှာဖြစ်ပါတယ်။ Myanmar idol Season 3 winner ဆုအတွက် ဖြိုးမြတ်အောင်နဲ့ ချမ်းမြေ့မောင်ချို တို့ကို အားပေးတဲ့ ပရိသတ်တွေကတော့ အင်တိုက် အားတိုက်ကို အားပေးနေကြပြီး Winner ဖြစ်ဖို့ နှစ်ဦးစလုံး ရေပန်းစား နေကြပါတယ်။