အနံ့ထွက်နေသလား.. သတိထား

ဒီတစ်ခါ ပြောပြချင်တာကတော့ အမျိုးသမီး ကျန်းမာရေး ကိစ္စ တစ်ခုပါ။ အမျိုးသမီး ကျန်းမာရေးနဲ့ ပတ်သတ်ပြီး အများကြီးရှိတဲ့ အထဲမှာမှ မိန်းမကိုယ် လမ်းကြောင်းမှာ ဘတ်တီးရီးယားပိုး ဝင်လို့ ခံစားရတဲ့ ဝေဒနာအကြောင်း ဖြစ်ပါတယ်။

အမျိုးသမီးတွေရဲ့ ပုံမှန် မိန်းမကိုယ် လမ်းကြောင်းကို vaginal tract လို့ခေါ်တယ်။ ဒီလမ်းကြောင်းထဲမှာ ကောင်းတဲ့ ပိုးမွှားရယ် မကောင်းတဲ့ ပိုးမွှားရယ် ဆိုပြီး ရှိကြတယ်။ ပုံမှန်အားဖြင့်တော့ ကောင်းတဲ့ ပိုးလေးတွေ ပိုများပါတယ်။ ၉၅ ရာခိုင်နှုန်းလောက်က lactobacillus လို့ခေါ်တဲ့ အကောင်လေးတွေ ဖြစ်တယ်။

ဒီကောင်းတဲ့ ကောင်လေးတွေက မိန်းမကိုယ် လမ်းကြောင်းမှာ ပုံမှန် အက်စစ်ဓာတ် ရှိအောင် ထိန်းညှိပေးထားတယ်။ မကောင်းတဲ့ ပိုးတွေကိုလည်း ထိန်းချုပ်ပေးတယ်။ သို့ပေမဲ့ ရံဖန်ရံခါမှာ အကြောင်း တစ်ခုခုကြောင့် ဒီပိုးကောင် ပမာဏ ကျသွားချိန်မှာ မိန်းမကိုယ် လမ်းကြောင်း ပိုးဝင်တာ ဖြစ်လာတယ်။

အခုချိန် အထိတော့ ဘာတွေက ဒီပိုးကောင်ရေ ပမာဏ မညီမမျှမှုကို ဖြစ်စေတာလဲ ဆိုတာ သေချာ မသိသေးပါဘူး။ ဒါပေမဲ့ ကိုယ်က အောက်ပါ အခြေအနေတွေနဲ့ ကိုက်ညီနေမယ် ဆိုရင်တော့ ပိုဖြစ်နိုင်ခြေ များတာကို တွေ့ရတယ်

– လိင်ဆက်ဆံဖော်၊ ဆက်ဆံဖက် တစ်ဦးထက် ပိုထားတာ

– ကွန်ဒုံး မသုံးတာ

– မိန်းမကိုယ် လမ်းကြောင်းကို မကြာခဏ နှိုက်ဆေးတတ်တာ

– သားအိမ်ထဲ သန္ဓေတား ပစ္စည်းထည့်တာ

– ဆေးလိပ်သောက်တာ

ဒါ့ကြောင့် အပေါ်က အရာတွေလုပ်တာ ကန့်သတ်လိုက်မယ် ဆိုရင်တော့ ကိုယ့်မှာ မိန်းမကိုယ် လမ်းကြောင်း ပိုးဝင်နိုင်ခြေ လျော့သွားနိုင်ပါတယ်။ ဒီလို မိန်းမကိုယ် ပိုးဝင်ခြင်းက လိင်ဆက်ဆံမှု ပြုရင် ပိုဖြစ်တတ်ပေမဲ့ ယောင်္ကျားလေးကနေ မိန်းကလေးကို ကူးတာမျိုး မဟုတ်လို့ သူ့ကို လိင်မှတစ်ဆင့် ကူးစက်တဲ့ ပြဿနာထဲတော့ မထည့်ထားပါဘူး။

ရောဂါဖြစ်တဲ့ မိန်းကလေး အများစုက ဘာလက္ခဏာမှ ခံစားရလေ့ မရှိကြဘူး။ ခံစားရမယ်ဆို အသိသာဆုံး လက္ခဏာက မိန်းမကိုယ်က အရည်ဆင်းတာပဲ ဖြစ်တယ်၊ အရည်က အညိုရောင်၊ အဖြူရောင်၊ အဝါရောင် စတဲ့ အရောင်တွေ ဖြစ်နိုင်တယ်။

အနံ့ကလည်း ငါးညှီနံ့ နံမယ်၊ အထူးသဖြင့် လိင်ဆက်ဆံပြီးရင် ပိုဆိုးမယ်။ သို့ပေမဲ့ ပိုးဝင်ပြီး ဘာလက္ခဏာမှ မပြတဲ့ အမျိုးသမီးတွေလည်း ရှိပါတယ်။ ဒါပေမဲ့ အနံ့နံတဲ့ အရည်ဆင်းတိုင်း မိန်းမကိုယ်လမ်းကြောင်း ပိုးဝင်တာလို့တော့ ပြောလို့ မရတောကြောင့် ဆေးခန်းတော့ သွားပြပြီး စစ်ဆေးမှုခံယူဖို့ လိုအပ်ပါတယ်။

စစ်ဆေးတဲ့အခါ မိန်းမကိုယ် လမ်းကြောင်း စစ်ဆေးတာ ပါမယ်၊ နောက်ပြီး ထွက်တဲ့ အရည်ကို နမူနာ ယူရပါတယ်။

ဒီရောဂါက ခံစားရတာ မသက်မသာ ဖြစ်စေပေမဲ့ အရမ်းကြီး အသက်အန္တရာယ် စိုးရိမ်ရတဲ့ ရောဂါမျိုးတော့ မဟုတ်ပါဘူး။ ဒါ့ကြောင့် ပုံမှန်အားဖြင့်တော့ မိန်းမကိုယ်ထဲ ဆေးတောင့်ထည့်တာ၊ လိမ်းဆေး၊ ပိုးသတ်ဆေးလောက်နဲ့ပဲ ပျောက်လေ့ရှိပါတယ်။ Metro၊ Clindamycin အစရှိတဲ့ ဆေးတွေ ပေးလေ့ရှိပါတယ်။

ကုသမှု ခံယူနေတုန်းတော့ လိင်ဆက်ဆံတာ ရပ်ထားဖို့ လိုတယ်။ ဆေးသောက်ပြီး ရက်အနည်းငယ်လောက်မှာ ရောဂါပျောက်ကင်း သွားမှာပါ။ ဒါပေမဲ့ ဝေဒနာတွေ ပျောက်ပြီ ဆိုပြီး မရပ်လိုက်ပါနဲ့။ ဆေးကို ဆရာဝန် သတ်မှတ်ထားတဲ့ အချိန်ကာလ ပြည့်အောင် သောက်ဖို့တော့ လိုအပ်တယ်။

နောက်ပြီး ဒီလို ပိုးဝင်တာက ပြန်ဖြစ်တတ်ပါတယ်။ များသောအားဖြင့် ၃ လလောက် အတွင်းမှာ နောက်တစ်ခါ ပြန်ဖြစ်တတ်တယ်။ ဒီလိုဆိုရင် ဆေးကို အချိန်ကြာကြာလေး သောက်ဖို့ လိုလာနိုင်တယ်။

နောက်ဆုံးနဲ့ အရေးအကြီးဆုံး မှာချင်တာက တကယ်လို့ ကိုယ်က ကိုယ်ဝန်ဆောင် ထားရတယ် ဆိုရင်တော့ ပိုသတိထား သင့်ပါတယ်။ ဘာ့ကြောင့်လည်း ဆိုတော့ ဒီလို မိန်းမကိုယ် ပိုးဝင်တာကြောင့် ကိုယ်ဝန်သည်တွေမှာ (ရှားတော့ ရှားပေမဲ့) အချိန်မတိုင်ခင် မီးဖွားတာနဲ့ သားပျက်သားလျှော ဖြစ်တာတွေ ကြုံတွေ့ရတတ်လို့ပါ။

Dr. Wayne
From..ondr