သက်ငယ်မုဒိန်းကို သေဒဏ်ပေးဖို့ အားမပေးတဲ့ အလှမယ် ထားထက်ထက်

၂ဝ၁၂ ခုနှစ် ကတည်းက မော်ဒယ်အလှမယ် တစ်ယောက်အဖြစ် အနုပညာ လောကထဲကို ဝင်ရောက်ခဲ့ကာ ၂ဝ၁၄ ခုနှစ်မှစ ၍ ဇာတ်ကားများ သရုပ်ဆောင်မှုတွင် ပါဝင်လာသော မော်ဒယ်သရုပ်ဆောင် အလှမယ် ထားထက်ထက်က သက်ငယ်မုဒိမ်း ကို သေဒဏ်ပေးဖို့ အားမပေးဘူး ဟု ဆိုပါသည်။

”မုဒိမ်းမှုတွေက တစ်ခုနဲ့ တစ်ခုဖြစ်ပုံချင်းက မတူဘူး။ တချို့တွေက ငယ်ရွယ်တဲ့အခါ စမ်းသပ်မှုဖြစ်တဲ့အခါမျိုးပေါ့။ သက်ငယ်မုဒိမ်းဆိုရင် အရမ်း အရွယ်မရောက်သေးတဲ့ နှစ်နှစ်၊ သုံးနှစ်ကလေးတွေကို မုဒိမ်းကျင့်တယ်ဆိုရင် ဒီကလေးတွေ ခံစားရတဲ့ ခံစားချက်တွေက အရမ်းပြင်းထန်တယ်လေနော်။ ဘယ်လိုမှ ကိုယ်တိုင်လည်းမခံစားနိုင်ဘူး။ ခံစားပေးလို့လည်း မရဘူး။ သည်းမခံနိုင်ဘူးပေါ့။ ခွင့်လွှတ်လို့ရတဲ့ ကိစ္စလည်း မဟုတ်ဘူး။ ပြစ်မှုကျူးလွန်တဲ့ သူတွေကို သေဒဏ်ပေးလိုက်ရင် သူတို့က ခဏလေးတင် တစ်ခါထဲ သေသွားမှာ။ ထားထက်ကတော့ သေဒဏ်ပေးဖို့ အားမပေးဘူး။

သေဒဏ်ထက်ကို သူတို့ကို ထောင်ဒဏ် အကန့်အသတ်မရှိတို့ နှစ်ရှည်ထောင်ဒဏ်ကိုမှ အလုပ်ကြမ်းနဲ့ထောင်ဒဏ်တွေ လွတ်ငြိမ်းချမ်းသာခွင့် မရှိဘူးပေါ့။ အဲဒီလို ကြီးမားတဲ့ ထောင်ဒဏ်ကြီးတွေကို ပိုပြီးတော့ လိုချင်တယ်။ လူမမယ်ကလေးတွေ ခံစားရတဲ့အတိုင်း သူတို့ခံစားဖို့ လိုတယ် ” ဟု ထားထက်ထက်က ပြောသည်။ သူမအနေဖြင့် လက်ရှိကာလတွင် စနေ၊ တနင်္ဂနွေ အားလပ်ရက်များ၌ အမျိုးသမီးများ၏ လုံခြုံမှုနှင့် မိမိကိုယ်ကို Strong ဖြစ်စေရန် ရည်ရွယ်လျက် ကိုယ်ခံအတတ်ပညာများအား HAY ( Health & Active Youth) အစီအစဉ်တွင် ပါဝင်သင်ကြား ပေးလျက်ရှိကြောင်း သိရသည်။

အားကစားသည် အမျိုးသမီးများ၏ လုံခြုံရေးနှင့် ဆက်စပ်မှုရှိကြောင်း ပြောပြရာတွင်လည်း ” မိန်းကလေးတစ်ယောက်အနေနဲ့ ကိုယ့်ကိုယ်ကိုယ် လုံခြုံဖို့အတွက် ကိုယ်ခံအတတ်ပညာရပ် အားကစားတစ်ခုခုကို တတ်ထား ဖို့လိုအပ်ပါတယ်။ အနည်းဆုံး အရမ်းကြီး ယောက်ျားလေးတစ်ယောက်နဲ့ အားပြိုင်ပြီး မယှဉ်နိုင်ဘူးဆိုရင်တောင် ခုခံကာကွယ်လို့ ရတယ်ဆိုတော့ တတ်ဖို့အရေးကြီးပါတယ်”ဟု ၄င်းက အကြံပြုပြောကြားသည်။

Credit:Unity Journal